शासकीय अभियांत्रिकी व संशोधन महाविद्यालय, अवसरी(खुर्द) येथिल राष्ट्रीय सेवा योजना (NSS) एककामार्फत दुर्गसंर्वधन मोहीम रविवार दि.१६/०२/२०२० रोजी राबविण्यात आली. यासाठी जुन्नर तालुक्यातील नारायणगाव पासून १० किमी. अंतरावर असलेला 'किल्ले नारायणगड' हा किल्ला निवडण्यात आला. किल्ल्यावर आवश्यक असलेली संवर्धनाची गरज व महत्व ओळखून या किल्ल्याची दुर्गसंवर्धन मोहिमेसाठी निवड करण्यात आली. सदर किल्ला समुद्र सपाटीपासून ८७६ मी. उंचीवर असून तो गिरीदुर्ग या प्रकारात मोडला जातो.

या मोहिमेत राष्ट्रीय सेवा योजना स्वयंसेवकांनी मुख्यतः स्वच्छता केली. त्यात सर्वप्रथम गडाच्या सर्वोच्च शिखरावर जावून तेथे असलेल्या हस्तामाता या देवीच्या मंदिराची स्वच्छता केली. तसेच मंदिरासमोर असलेली सुंदर अशी दीपमाळ व त्यासभोवतालचा परिसर स्वच्छ केला. त्याचबरोबर स्वयंसेवकांनी गडावरील असलेले पाण्याचे टाके साफ केले व काही स्वयंसेवकांनी खाली उतरून जमिनीलगत असलेले नारायण टाकी देखिल साफ केले.

गडावरची स्वच्छता आटोपल्यानंतर स्वयंसेवकांनी गडाखाली येऊन गडाच्या पायथ्याशी असलेल्या मुकाईदेवी मंदिर, त्यासभोवतालचा परिसर व गडाच्या पायथ्यालगतचीही स्वच्छता केली. सदर मोहीम रासेयो स्वयंसेवकांकडून दुर्ग संर्वधनाचे नियमांचे पालन करून पार पाडण्यात आली.

सदर मोहीमेचे आयोजन विदयार्थ्यी समन्वयक योगेश शिंदे, शुभम घोडके व सर्व रासेयो स्वयंसेवक यांनी केले. याकरिता राष्ट्रीय सेवा योजनेच्या स्वयंसेवकांना महाविद्यालयाचे प्राचार्य डॉ. अविनाश पंत, रासेयो कार्यक्रम अधिकारी श्री. मंगेश पांचाळ, व श्रीमती प्राजक्ता पिंपळकर यांचे मार्गदर्शन लाभले.